Силвана Жежова
Успешна ПР-стратегија индиректно значи добиени политички избори, значително поголема продажба, сериозно зголемен углед, суштинско влијание врз одреден процес на носење одлуки, коментираат експертите за односи со јавност во земјава.
Компаниите и државните институци сè уште не ја разбираат суштината на односите со јавност, критикуваат експертите од оваа професија. Дел од јавноста е во заблуда дека портпарол (ПР) е некој што им договара интервјуа на компаниите за весниците и телевизиите, иако потребата од ПР е далеку поголема. Одделот за односи со јавност треба да биде интегриран во комуникациската стратегија на компанијата. ПР како алатка мора да учествува во процесот на донесување одлуки на една компанија.
„Потребата од јасна, едноставна и ефективна комуникација никогаш не била попотребна од денес. Комуникацијата станува есенција на нашите животи. Во еден таков социокомуниколошки контекст да се освои и да се задржи довербата на јавноста станува пресудно за моќта и влијанието на секој политички и економски центар, а токму со тоа се занимава стратешкото ПР-комуницирање. Успешна ПР-стратегија денес индиректно значи добиени политички избори, значително поголема продажба, сериозно зголемен угед, суштинско влијание врз одреден процес на носење одлуки“, вели Маја Б.Талевска, ПР-директор во Њу момент.
Според Магдалена Михајлоска, пак, од маркетинг-агенцијата Имиџ ПР само една информација може да влијае на позитивната или негативната перцепција на луѓето за одредена компанија. Пазарот има потреба од специјалисти за односи со јавност или за комуникации, вели Михајлоска.
„Овој светски тренд е сè поевидентен и во Македонија и тоа во најголем дел кај поголемите компании и компаниите кои се дел од глобални корпорации. За жал, сè уште е мала свесноста за потребата од систематски изградени комуникации со сите целни публики кај домашните компании, што е резултат на неколку фактори. Но, во последно време работите се менуваат во позитивна насока“, додава Михајлоска за „Капитал“.
Во Високата школа за новинарство има класични додипломски студии за корпоративни комуникации и односи со јавност, како и додипломски студии за менаџмент на стратегиско комуницирање.
„Односите со јавност се на скалилото на висок топ-менаџмент како нешто што е дел од менаџирањето на целата фирма, како што е делот со човечки ресурси. Ако во топ- менаџментот немате некој кој ќе се занимава со комуникацијата внатре во организацијата и надвор кон целните публики, тогаш имате лоша репутација на сопствената работа и на производите што ги нудите“, смета Жанета Трајковска од Високата школа за новинарство.
Експертите забележуваат дека дел од компаните и институциите бараат агенција или консултант за односи со јавност само тогаш кога имаат некаква криза.
„Оние што одлучуваат сè уште не ја увиделе важноста и улогата на ПР, неговата потреба од континуираност и бенефитите кои ги носи. Сите компании, институции, оргaнизации треба да имаат човек или оддел за односи со јавност. Така се гради подобар имиџ во јавноста, има добри, посветени и мотивирани вработени, добри соработници, партнери, клиенти...“, вели Синиша Пекевски од Си комуникаци.
За да се дефинираат стандардите и правилата на работа во оваа професија, кон крајот на минатата година се основаше Здружение на специјалисти за односи со јавност, кое во иднина треба да се посвети на подигнување на стандардите во фелата. Здружението се формираше за да се надминат слабостите во професијата, иако и тоа не помина без контроверзии.
„И натаму нема кодекс на работа и општо прифатени стандарди, нема цврсто дефинирана занаетска страна на фелата, ниту јасна визија во која насока треба да се развива професијата. Веројатно затоа доминира импровизацијата. Има такви што упорно го мешаат ПР-от со спин, иако за добро упатените разликата меѓу нив е сосема јасна -црвената линија е лагата. Спинот лаже, збунува, ја извртува пораката, го дефокусира вниманието од една на друга порака. За ПР тоа е од другата страна на линијата и тоа не смее да си го дозволи, зашто ако еднаш излаже, никогаш веќе нема да му веруваат, особено медиумите. Друго е што можеби поимот ПР е многу растеглив и со него се идентификуваат сите, од вистински ПР-стратези, преку портпароли на институции или менаџери на кафулиња“, објаснува Талевска.
